Արա Բաբլոյանի անդրադարձը մամուլի հրապարակումներին
26 հունվար 2022

Արա Բաբլոյանի անդրադարձը մանկական բժշկական հաստատություններում ստացիոնար բուժման պայմանների մասին մամուլում տեղ գտած հրապարակումներին.
 

«Այո, մենք երեկ մասնակցել ենք Առողջապահության նախարարությունում կայացած քննարկմանը՝ մանկական բժշկական հաստատություններում երեխաների ստացիոնար բուժման պայմանների մասին:

Դա եղել է բազմակողմանի քննարկում՝ առողջապահության կազմակերպիչների, մանկական առողջապահական խոշոր կազմակերպությունների ղեկավարների եւ առողջապահական գերատեսչության մասնագետների միջեւ: Մենք, որպես մանկական առողջապահության կազմակերպիչներ և բժշկական հաստատությունների ղեկավարներ, կողմ ենք, որ հաստատվեն պացիենտներին հիվանդանոցներում անհարկի երկար պահելը կանխարգելող մեխանիզմներ, ինչը կբարելավի բուժական գործընթացի արդյունավետությունը:Բայց մենք նաեւ պարտավոր ենք պաշտպանել այն պացիենտների իրավունքները, որոնք հիվանդանոցային երկարատեւ բուժման կարիք ունեն, նրանք չպետք է մերժվեն՝ ընկնելով համընդհանուր մոտեցման ազդեցության տակ:
 

Մենք ուրախ ենք, որ քննարկման մասնակից բոլոր կողմերը կիսեցին այս կարծիքը եւ հույս ունենք, որ քննարկված օպտիմալ մեխանիզմը, որը կվերջնականացվի նախարարության որոշմամբ, կզուգակցի պացիենտների՝ ստացիոնարում անհարկի երկար մնալը կանխարգելող եւ երկարատեւ բուժման կարիք ունեցողների իրավունքները պաշտպանող գաղափարները»:

Կիսվել Facebook-ում
Վերջին նորություններ
Պրոֆեսոր Քրիստիան Բրեգերը կրկին «Արաբկիր» ԲԿ-ում
Պրոֆեսոր Քրիստիան Բրեգերը կրկին «Արաբկիր» բժշկական համալիրում էր` գաստրոէնտերոլոգիական եւ էնդոսկոպիկ ծառայությունների հետ շարունակական համագործակցության շրջանակում:   Ցյուրիխի համալսարանական մանկական հիվանդանոցում որպես գաստրոէնտերոլոգիայի եւ սննդաբանության ծառայության ղեկավար երկարամյա փորձառություն ունեցող պրոֆեսորը մի շարք խնդրահարույց կլինիկական դեպքերի խորհրդատվական քննարկումներ է անցկացրել ինչպես «Արաբկիրի» գործընկերների, այնպես էլ այլ բժշկական հաստատությունների մասնակիցների հետ։   Պրոֆեսորի անմիջական դիտարկմամբ իրականացվել են մի շարք էնդոսկոպիկ միջամտություններ` գաստրոսկոպիա եւ կոլոնոսկոպիա բազմաստիճան բիոպսիաներով, ինչպես նաեւ միջմաշկային էնդոսկոպիկ գաստրոստոմայի` PEG-ի տեղադրումներ նյարդաբանական խանգարումներով երեխաների, որոնք ունեն կլման ակտի, այդպիսով եւ սնուցման լուրջ դժվարություններ:   Այցի շրջանակում Քրիստիան Բրեգերը հանդիպել եւ համագործակցության նոր գաղափարներ է քննարկել նաեւ «Արաբկիր» բժշկական համալիրի գիտական ղեկավար, պրոֆեսոր Արա Բաբլոյանի հետ: #arabkirmc #gastroenterology #գաստրոէնտերոլոգիա #endoscopy
Բարի տարեդարձ, Աշոտ Վարոսի
‼️🎉«Արաբկիր» բժշկական համալիրի հենասյունային ծառայություններից մեկի` ինտենսիվ թերապիայի եւ վերակենդանացման ծառայության ղեկավար Աշոտ Վարոսի Գյուլբուդաղյանի 70-ամյակն է: Մասնագետ, որի նվիրական աշխատանքի շնորհիվ տասնամյակներ շարունակ հազարավոր երեխաների կյանքեր են փրկվել` բառի ամենաբուն իմաստով, մարդ, որի սրտացավության ու կարեկցանքի շնորհիվ սփոփվել են անգամ ամենածանր վիճակում հայտնված ծնողներն ու խաղաղվել նրանց մտքերը:    Շնորհավորում ենք, սիրելի Աշոտ Վարոսի, Ձեր ներդրումն անգնահատելի է, անչափելի` ոչ միայն մեր համալիրի, այլեւ ամբողջ հանրապետության մասշտաբով: Առողջություն, անսահման սեր եւ արեւշատություն ենք մաղթում Ձեզ եւ Ձեր ընտանիքին ❤️   Աշխատանքն «ինտենսիվ թերապիայում» ինտենսիվ է, նկարահանումները` ճիշտ հակառակը: Այդ պատճառով առաջարկում ենք մեկ անգամ եւս դիտել Հանրային հեռուստաընկերության` ավելի վաղ պատրաստած տեսանյութերից մեկը` գյուղատնտեսական թունաքիմիկատից երեխայի ծայրահեղ ծանր թունավորման մասին: Մեկ անգամ եւս դիտեք, լսեք վաստակաշատ բժիշկ Աշոտ Գյուլբուդաղյանի խորհուրդները, սիրելի ծնողներ, եւ աչալուրջ եղեք երեխաների առողջության նկատմամբ: