Պատանեկան իդիոպաթիկ արթրիտի օրվա առիթով «Արաբկիր» բժշկական համալիրում էր Առողջապահության նախարար Անահիտ Ավանեսյանը:
Երեխաների, ծնողների, բժիշկների հետ անմիջական շփման այս ձեւաչափը համահունչ է միջազգային օրվա հիմնական նպատակին` բարձրացնել իրազեկվածությունն ու ասել, որ շնորհիվ բժշկագիտության ձեռքբերումների` այս խնդիրն արդեն մեծապես կառավարելի է, հաղթահարելի են դժվարություններն ու բուժական ճիշտ տակտիկայի ու արդյունավետ դեղերի միջոցով կարելի է պահպանել ու լավացնել երեխաների կյանքի որակը:
«Արաբկիր» բժշկական համալիրն այս գաղափարների կրողն է տասնամյակներ շարունակ: Հենց այդ գաղափարներով է, որ ստեղծվել եւ Հայաստանի ռեւմատոլոգներից շատերի համար մասնագիտական ձեւավորման յուրահատուկ դարբնոց է դարձել մանկական ռեւմատոլոգիական ծառայությունը` ախտորոշիչ, բուժական եւ դիսպանսեր վերահսկողության լայնածավալ գործառույթներով:
«Արաբկիր» բժշկական համալիրի եւ Առողջապահության նախարարության համատեղ ջանքերով 2024թ-ից հնարավոր է դարձել պատանեկան իդիոպաթիկ արթրիտ ունեցող երեխաներին եւ նրանց ընտանիքներին ձեռք մեկնած կարեւոր ու աննախադեպ մի ծրագիր եւս. երեխաներն անհրաժեշտ դեղերը ստանում են պետական պատվերի շրջանակում: