«Արաբկիր» բժշկական համալիր-երեխաների և դեռահասների առողջության ինստիտուտը Հայաստանի խոշոր բժշկական հաստատություններից է, ամենամեծը` մանկական կլինիկաների շարքում: Ստեղծվել է 1997թ-ին` որպես «Արաբկիր» բժշկական կենտրոն վարձակալական ձեռնարկություն ՍՊԸ: 1999թ-ին մասնավորեցվել է, 2003-ին միացել «Հանրապետական մանկական կլինիկական հիվանդանոցին», վերանվանվել «Արաբկիր» բժշկական համալիր-երեխաների և դեռահասների առողջության ինստիտուտ` որպես այդ կազմակերպությունների իրավահաջորդ: 2009թ-ին ընկերությանը միացել է նաև «Հանրապետական մանկական պաթանատոմիական կենտրոնը»:
Համալիրում գործում են արտահիվանդանոցային կաբինետներ, հիվանդանոցային բաժանմունքներ, դիսպանսեր վերահսկողության և վերականգնողական ծառայություններ` տարեկան սպասարկելով հարյուր հազարավոր պացիենտների, որոնց մեծամասնությունը՝ երեխաներ: Համալիրը վերականգնողական ծառայություններ է իրականացնում նաև մի շարք մարզերում: Բացի պրակտիկ բժշկական գործունեությունից, «Արաբկիրն» իրականացնում է նաև գիտական ու մեթոդաբանական աշխատանքներ` որպես Երեխաների և դեռահասների առողջության ինստիտուտ:
Մեր առաքելությունն է` անել առավելագույնը հանուն պացիենտի, հետևապես և հասարակության առողջության:
Մեր նպատակն է` հասանելի դարձնել ժամանակակից բժշկագիտության ձեռքբերումները մեր պացիենտներին:
Մեր սկզբունքներն են` գործել որպես մարդասեր, ազնիվ, թափանցիկ ու պատասխանատու կազմակերպություն:
Մեր երաշխիքներն են` միջազգային չափորոշիչներով աշխատանքը, անհատական մոտեցումը, սպասարկման որակը:
Մեր ձեռագիրն է` թիմային աշխատանքը` միջազգային մի շարք բարձրակարգ կլինիկաների հետ համագործակցությամբ:
«Արաբկիր» ԲՀ-ԵԴԱԻ կառավարման խորհրդի նախագահն ու գիտական ղեկավարը Արա Սայենի Բաբլոյանն է` մանկական վիրաբույժ-ուրոլոգ, բժշկական գիտությունների դոկտոր, պրոֆեսոր:
«Արաբկիր» ԲՀ-ԵԴԱԻ տնօրենը Արման Արայի Բաբլոյանն է` առողջապահության կազմակերպիչ, ստոմատոլոգ:
