«ԱրԲեՍ» առողջության կենտրոնը հիմնադրվել է 1999թ-ին և գործում է նախկին «Արաբկիր» մանկական հիվանդանոցի վերակառուցված մասնաշենքում: Մասնաշենքի վերակառուցումն ու վերանորոգումն իրականացվել է «Արաբկիր» Բժշկական համալիրի և իր գործընկերների` շվեյցարական SEMRA հիմնադրամի, «Անմիջական օգնություն Հայաստանին» (VAD) ասոցիացիայի, Շաֆհաուզենի Radio Munot-ի, բելգիական NAF-Belgique ասոցիացիայի և SOS-Armenie կազմակերպության միասնական ջանքերով:
2005թ. ապրիլին «ԱրԲեՍ» ԱԿ-ում բացվել է Ցերեկային խնամքի և բուժման կենտրոնը` հատուկ կարիքներով երեխաների զբաղվածությունը կազմակերպելու նպատակով, ինչը խթան է հանդիսանում նրանց ներառմանը հասարակություն: Ցերեկային խնամքի և բուժման կենտրոնը կառուցել է շվեյցարացի շինարար Լեո Գմյուրը` շվեյցարական «Անմիջական օգնություն Հայաստանին» (VAD) ասոցիացիայի, «Արմենիանոս» հիմնադրամի (Լիխտենշտեյն), KASA բարեգործական հիմնադրամի աջակցությամբ:
Երեխաների զարգացման խանգարումների և դրանցից բխող հատուկ կարիքների վաղ հայտնաբերումը, գնահատումը և վաղ միջամտությունը, հոգեբանական և սոցիալական վերականգնումը, ինչպես նաև նրանց ծնողների, մանկավարժների, ընկերների իրազեկումն ու կրթությունը լավագույն նախապայմաններն են երեխաների վերականգնման, նրանց հետագա բարեկեցության և սոցիալական ներառման ապահովման գործընթացում: Առաջնորդվելով վերոնշյալով` մենք մեր ջանքերն ուղղում ենք հատուկ կարիքներ ունեցող երեխայի ամբողջ ներուժի բացահայտմանն ու զարգացմանը:
Մասնագիտական ոլորտներ
«ԱրԲեՍ» ԱԿ-ն վերականգնողական ծառայություններ է մատուցում զարգացման հապաղումներով, նյարդաբանական և նյարդամկանային խանգարումներով և հետվնասվածքային խնդիրներով երեխաներին և դեռահասներին:
Ամբուլատոր ծառայություններ
«ԱրԲեՍ» ԱԿ-ում իրականացվում են ամբուլատոր մի շարք ծառայություններ. վերականգնողական, զարգացման մանկաբուժության, հոգեբանական, ինչպես նաև կրթական գործունեություն` հատուկ կարիքներ ունեցող երեխաների և նրանց ընտանիքների համար: Հոգեկան առողջության, ֆիզիկական, հոգեբանական, կրթական և վարքային խնդիրներ ունեցող երեխաների բուժման և խնամքի տրամադրումը երկարատև գործընթաց է, որը պահանջում է թիմային աշխատանք: Վերականգնողական ծառայությունների բարձր որակը բազմամասնագիտական թիմի մասնագետների համագործակցության արդյունքն է։ Թիմի անդամներն են.
Հայաստանի և արտասահմանյան առաջատար կենտրոններում վերապատրաստված մասնագետները իրենց աշխատանքում հմտորեն օգտագործում են վերականգնողական մոտեցումների նորարարական մեթոդները: Թիմի հոգատար մոտեցումը երեխաների և նրանց ծնողների նկատմամբ, ընկերական մթնոլորտը, ինչպես նաև մեթոդական հատուկ պարագաներով հագեցած խորհրդատվության և թերապիայի սենյակները ծառայություններն և խնամքը դարձնում են առավել արդյունավետ:
Համագործակցություն
«ԱրԲեՍ» ԱԿ-ն համագործակցում է Ֆիզիկական կուլտուրայի հայկական պետական ինստիտուտի և Խ.Աբովյանի անվան հայկական պետական մանկավարժական համալսարանի /հատուկ կրթության ֆակուլտետ/ հետ` հանդիսանալով գործնական դասընթացների բազա ուսանողների համար:
«ԱրԲեՍ» ԱԿ-ն միջազգային ընկերությունների հետ համագործակցությամբ կազմակերպում է բազմամասնագիտական թիմերի կրթությանն ուղղված բազմաթիվ գիտաժողովներ և դասընթացներ, որոնք վարում են արտասահմանցի և տեղացի ճանաչված մասնագետներ: «ԱրԲեՍ»-ի մասնագետների անմիջական աջակցությամբ են վերապատրաստվել Հայաստանում գործող մանկական վերականգնողական ծառայությունների գրեթե բոլոր մասնագետները:
«ԱրԲեՍ» ԱԿ-ի հիմնական գործընկերը Ցյուրիխի Համալսարանական հիվանդանոցն է /Զարգացման մանկաբուժության ծառայություն/։
Մարզային մասնաճյուղեր
«ԱրԲեՍ» ԱԿ-ի ջանքերով Հայաստանի մի քանի մարզերում /Գեղարքունիք, Տավուշ, Արարատ, Արագածոտն/ բացվել են երեխաների զարգացման և վերականգնողական կենտրոններ: Նպատակը` մատուցվող վերականգնողական ծառայություններն առավել մատչելի ու հասանելի դարձնել մարզերում ապրող երեխաներին ու ընտանիքներին: Մարզային կենտրոնները գործում են հետևյալ քաղաքներում.
Աշխատակազմ
Մանուշակ Երիցյան, տնօրեն
Գայանե Զաքարյան, վերականգնողական ծառայության ղեկավար
Իրինա Թովմասյան, մանկաբուժական ծառայության ղեկավար
Կարինե Լյուլեջյան, մանկական հոգեբուժության ծառայության ղեկավար