Անէսթեզիոլոգիայի և ինտենսիվ թերապիայի բաժանմունքն ապահովում է պլանային և անհետաձգելի վիրաբուժական միջամտությունների անզգայացումը, ինչպես նաև հիվանդների հետվիրահատական ինտենսիվ թերապիան: Ներկայում բաժանմունքն իր գործունեությունն իրականացնում է 13 վիրահատարանում` ինտենսիվ թերապիայի 6, արթնացման սրահի 8 մահճակալների միջոցով: Բաժանմունքն ունի նաև 2 առանձնացված հիվանդասենյակ` հետփոխպատվաստումային (լյարդի,երիկամի) շրջանում հիվանդների ինտենսիվ թերապիայի համար:
Բաժանմունքը հագեցած է ժամանակակից և միջազգային ստանդարտներին համապատասխան բոլոր անհրաժեշտ սարքավորումներով.
- արհեստական շնչառության ապահովման նորագույն էքսպերտային դասի սարքավորումներ, որոնք հնարավորություն են տալիս կիրառել տարատեսակ ռեժիմներ և կատարել շնչառական ֆունկցիայի ծավալուն մոնիթորինգ,
- հիվանդների մոնիթորինգի կենտրոնացված համակարգ, որը հնարավորություն է տալիս ստանալ, գրանցել, պահպանել և փոփոխել գործընթացի արդյունքում ստացված ցուցանիշները, կատարել ժամանակակից ինտենսիվ թերապիայում կիրառվող հեմոդինամիկայի, շնչառության ինվազիվ և ոչ ինվազիվ լիարժեք վերահսկողություն՝ կենտրոնական համակարգչի օգնությամբ:
Բաժանմունքում աշխատում են բարձր որակավորում ունեցող պրոֆեսիոնալ մասնագետներ, որոնք տիրապետում են անէսթեզիոլոգիական ապահովման ժամանակակից բոլոր մեթոդներին:
Բաժանմունքում տարեկան իրականացվում է ավելի քան 3800 վիրահատություն՝ մանկական և մեծահասակների ընդհանուր վիրաբուժական, ուրոլոգիական, օրթոպեդիկ, ԼՕՌ, լազերային, պլաստիկ, նեյրովիրաբուժական: