Մարտի 4-ը ճարպակալման դեմ պայքարի համաշխարհային օրն է
Առողջապահության համաշխարհային կազմակերպության Մանկական ճարպակալման համաճարակաբանական հսկողության եվրոպական նախաձեռնության (COSI) տվյալներով Հայաստանում ապրող 7-8 տարեկան երեխաների 27.7%-ն ավելորդ քաշ ունի, 12.6%-ը` ճարպակալում։ Ընդ որում, ավելորդ քաշով եւ ճարպակալմամբ տղաների թիվը հասնում է 30%-ի, աղջիկներինը՝ 25%-ի:
Նմանատիպ տվյալներ են նաեւ մեր երկրի դպրոցականների առողջության վարքագծի հետազոտության (HBSC) մեջ. 11 տարեկան տղաների 31%-ը, աղջիկների 17%-ը, 13 տարեկան տղաների 27%-ը, աղջիկների 15%-ը, եւ 15 տարեկան տղաների 25%-ը, աղջիկների 12%-ն ավելորդ քաշ կամ ճարպակալում ունի։
Նշված հետազոտությունները Հայաստանում իրականացնում է «Արաբկիր» բժշկական համալիրի` 2024թ-ին Առողջապահության համաշխարհային կազմակերպության համագործակցող կենտրոն ճանաչված Երեխաների եւ դեռահասների առողջության ինստիտուտը:
Ճարպակալումը բազմագործոն քրոնիկական խնդիր է, բնորոշվում է ճարպի կուտակումով, ինչը բերում է առողջության վատթարացման։
Ավելորդ քաշից եւ ճարպակալումից խուսափելու նպատակով անհրաժեշտ է․
- սահմանափակել հեռախոսի, համակարգչի, հեռուստացույցի եւ ցանկացած այլ էկրանին նայելու ժամանակը,
- օրական առնվազն 1 ժամ լինել ֆիզիկապես ակտիվ,
- սահմանափակել քաղցրավենիքի օգտագործումը,
- սնվել կանոնավոր,
- լինել տեղեկացված եւ զերծ մնալ մեծ քանակով շաքար, աղ, ճարպեր պարունակող սննդից,
- պահպանել քնելու ռեժիմը,
- ժամանակին այցելել բժշկի: