Բուժքույրական խորհուրդ
Բուժքույրական խորհուրդ

«Արաբկիր» ԲՀ-ի բուժքույրական խորհուրդը ստեղծվել է 2006թ-ին` «Արաբկիրի» և շվեյցարական «Սեմռա պլյուս» հիմնադրամի նախաձեռնությամբ` բուժքույրական խնամքի որակի բարձրացման և բուժքրոջ ինքնավար դերի ամրապնդման համար: 

 

Խորհրդի նպատակներն են. 

  • ստեղծել մշտապես գործող բուժքույրական դպրոց՝ ուղղված հետդիպլոմային շարունակական մասնագիտական զարգացմանը, 
  • դասընթացների միջոցով կրթել և  գործի միջազգային նորարարական մոտեցումները փոխանցել համալիրում աշխատող և փորձաշրջան անցնող  բուժքույրերին,
  • ուսումնասիրել համալիրում առկա կարիքներն ու առաջարկել դրանց բարելավման տարբերակներ,
  • իրականացնել բուժքույրական խնամքին առնչվող նոր ծրագրեր` բարձրացնելով սպասարկման որակը:

 Բուժքույրական խորհուրդը մշտական համագործակցության մեջ է շվեյցարացի գործընկերների հետ: Կանոնադրությամբ խորհրդին իրավունք է վերապահվում քննարկել միջին և կրտսեր բուժաշատողների միջև ծագած անհամաձայնությունները, մտածել խնդիրների լուծման տարբերակներ, քննարկել դրանք և քվեարկությամբ ընտրված տարբերակը ներկայացնել տնօրինությանը: Խորհուրդն ակտիվորեն կարող է մասնակցել նաև աշխատանքային ուղեցույցներ կազմելու գործընթացին: 

 

Խորհուրդն ունի  նախագահ և 7 անդամ, որոնք ընտրվում են ըստ կանոնադրության:

Խորհրդի նախագահն է Ամալյա Մարտիրոսյանը:
Անդամներն են Անահիտ Ասատրյանը, Հասմիկ Հայրապետյանը, Վարդանուշ Ավետիսյանը, Աննա Շեգունցը, Անահիտ Պողոսյանը, Գայանե Մարգարյանը:

 

Կիսվել Facebook-ում
Առողջության մասին
Շնորհակալական նամակ Բելառուսի դեսպանին
«Արաբկիր» բժշկական համալիրի գիտական ղեկավար, պրոֆեսոր Արա Բաբլոյանը շնորհակալական նամակ է հղել Հայաստանում Բելառուսի Հանրապետության դեսպան պարոն Ալեքսանդր Կոնյուկին` եւս մեկ երեխայի կյանքի փրկության կարեւոր գործում բելառուս մեր գործընկերների մեծ աջակցության համար:   Շնորհակալ ենք նաեւ մեր հավատարիմ բարեկամին` Հայաստանի երեխաների առողջության հիմնադրամին` երեխայի վիրահատության, Մինսկ գնալ-վերադառնալու հարցերում ցուցաբերած աջակցության համար։   Մեծարգո պարոն դեսպան, ընդունեք մեր երախտիքի խոսքը` եւս մեկ երեխայի կյանքի փրկության կարեւոր գործում բելառուս մեր գործընկերների մեծ աջակցության համար: Խոսքը 14-ամյա տղայի` Խաչինյան Ռաֆայելի մասին է: Նա ծնվել է 2008թ-ին` լյարդի բնածին ֆիբրոզով, եւ տարիների ընթացքում անհրաժեշտություն է ծագել լյարդի փոխպատվաստման, որը հանդիսանում է այդ խնդրի լուծման միակ մեթոդը: Փոխպատվաստումն իրականացվել է 2023թ-ի հունվարի 31-ին, Երեւանում` «Արաբկիր» բժշկական համալիր-երեխաների եւ դեռահասների առողջության ինստիտուտի եւ Մինսկի վիրաբուժության, տրանսպլանտոլոգիայի եւ արյունաբանության գիտա-պրակտիկ կենտրոնի բժիշկների համատեղ ջանքերով` պրոֆեսոր Օլեգ Օլեգի Ռումմոյի ղեկավարությամբ: Վիրահատությունն անցել է հաջող, սակայն հետվիրահատական շրջանն ընթացել է ալիքաձեւ` երկու կրիզիսային դրվագով. երեխայի մոտ սկսվել էր փոխպատվաստված օրգանի սուր արտավանում: Առաջին դրվագում խնդիրը կարգավորվել է կոնսերվատիվ ընդունված միջոցներով, սակայն երկրորդ էպիզոդում դա հնարավոր չի եղել, ինչն էլ պատճառ է դարձել երկու կլինիկաների մասնագետների համատեղ որոշման` երեխային տեղափոխել Մինսկ` հետագա հետազոտման եւ բուժման նպատակով: Երեխան Մինսկ է տեղափոխվել մարտի 11-ին եւ վերադարձել մարտի 24-ին` առողջության կայունացած վիճակում: Այս դեպքը ոչ միայն մասնագիտական հզոր կարողությունների, այլեւ մեծ մարդասիրության, բարեսրտության, առողջ ու ազնիվ համագործակցության արդյունքների մասին է: Շնորհակալ ենք մեր փոքրիկ հայրենակցին, նրա ընտանիքին եւ, իհարկե, մեզ` որպես լյարդի փոխպատվաստման սկսնակ կլինիկայի մասնագետներ, մենակ չթողնելու համար: Ցանկանում ենք նշել նաեւ, որ ավիատոմսերի հարցում էլ մեծ աջակցություն է ցուցաբերել բելառուսական «Բելավիա» ընկերությունը, ինչի համար նույնպես խորապես շնորհակալ ենք: Հարգանքով` Արա Բաբլոյան Պրոֆեսոր, «Արաբկիր» ԲՀ-ԵԴԱԻ գիտական ղեկավար  
Մարտի 26. Էպիլեպսիա. Մանուշակագույն օր
Այսօր մարտի 26-ն է՝ էպիլեպսիայի մասին իրազեկման կամ ինչպես ընդունված է ասել՝ Մանուշակագույն օրը: Աշխարհում մոտ 50 մլն մարդ էպիլեպսիա ունի: Սա խնդիր է, բայց ոչ դատավճիռ: Ժամանակակից բժշկագիտությունն արդյունավետ առաջարկներ ունի էպիլեպսիա ունեցող մարդկանց՝ դեղորայքային, վիրաբուժական, անգամ՝ կենսակերպային: «Արաբկիր» բժշկական համալիրի նյարդաբանների եւ նյարդավիրաբույժների թիմը Հայաստան է բերում արդի էպիլեպտոլոգիայի բոլոր նորություններն ու պացիենտների կողքին է՝ բուժման ամենաարդյունավետ մեթոդներով: «Արաբկիրում» է գործում մանկական էպիլեպսիայի դիսպանսերը, որտեղ գրանցված է 0-18 տարեկան 3600-ից ավել պացիենտ: Նրանց մեծամասնությունը ստանում է դեղորայքային բուժում, որոշներին ցուցվում է վիրահատությունը, ինչն արդեն նույնպես հնարավոր է մեր բժշկական համալիրում: Այս անգամ էպիլեպսիայի մասին ամենահաճախ հնչող հարցերի պատասխանները լսեք մեծահասակների նյարդաբան Լուսինե Վարդանյանից, եղեք տեղեկացված եւ դրսեւորեք ճիշտ վարքագիծ, եթե ձեր կողքի մարդու մոտ էպիլեպտիկ ցնցումներ են սկսվում: